ಜನತೆಗೆ ಮತ್ತೆ ಬೆಲೆ ಏರಿಕೆಯ ಶಾಕ್ - ಕೋಳಿ ಮಾಂಸ , ಮೀನು , ಮಸಾಲೆ ಪದಾರ್ಥಗಳ ಬೆಲೆ ಏರಿಕೆ ..

ವಿಧಾನಸಭೆ ಚುನಾವಣೆ ಮುಗಿಯುತ್ತಿದ್ದಂತೆ ತೊಗರಿ ಬೇಳೆ ಸೇರಿದಂತೆ ಬೇಳೆ ಕಾಳುಗಳು, ಮಸಾಲೆ ಪದಾರ್ಥಗಳ ಬೆಲೆ ಏರಿಕೆಯತ್ತ ಸಾಗಿವೆ. ಕೆಲವು ತರಕಾರಿಗಳ ದರವೂ ಹೆಚ್ಚಳವಾಗಿದ್ದು, ಕೋಳಿಮಾಂಸ, ಮೀನು ದುಬಾರಿಯಾಗಿದೆ. ಹಣ್ಣಿನ ಬೆಲೆಯಲ್ಲಿ ವ್ಯತ್ಯಾಸವಾಗಿಲ್ಲ. 

ಬೇಳೆ ದುಬಾರಿ
ಈವರೆಗೆ ಅಲ್ಪ ಪ್ರಮಾಣದಲ್ಲಿ ಏರಿಕೆ ಕಂಡ ನಿಯಂತ್ರಣದಲ್ಲಿಇದ್ದ ಬೇಳೆ ಕಾಳುಗಳ ಬೆಲೆ ಈ ವಾರ ಮತ್ತೆ ಹೆಚ್ಚಳವಾಗಿದೆ. ತೊಗರಿ ಬೇಳೆ ಕೆಜಿ ರೂ.120-130, ಉದ್ದಿನ ಬೇಳೆ ಕೆಜಿ ರೂ.120-140, ಅವರೆಕಾಳು ಕೆಜಿಗೆ ರೂ 135-140ಕ್ಕೆ ಜಿಗಿದಿದೆ. ಹುರಳಿ ಕಾಳು, ಕಡಲೆಬೀಜ ಸಹ ಅಲ್ಪ ಏರಿಕೆಯಾಗಿದೆ. ಅಕ್ಕಿ ಧಾರಣೆಯೂ ಕೆಜಿಗೆ 3ರಿಂದ 5 ರೂಪಾಯಿಗಳಷ್ಟು ಹೆಚ್ಚಳವಾಗಿದೆ.

ಹೂವಿಗೆ ಬೇಡಿಕೆ
ಮದುವೆ, ಗೃಹ ಪ್ರವೇಶದಂತಹ ಶುಭ ಸಮಾರಂಭಗಳು ಹೆಚ್ಚು ನಡೆಯುತ್ತಿರುವುದರಿಂದ ಎಂ.ಜಿ.ಮಾರುಕಟ್ಟೆಯಲ್ಲಿ ಗ್ರಾಹಕರ ಸಂಖ್ಯೆ ಹೆಚ್ಚಾಗಿದೆ ಎಂದು ಹೂವಿನ ವ್ಯಾಪಾರಿಗಳು ಹೇಳಿದರು. ಬೇಡಿಕೆ ಹೆಚ್ಚಿರುವುದರಿಂದ ಬೆಲೆಯಲ್ಲೂಏರಿಕೆಯಾಗಿದೆ.  ಮಾರುಕಟ್ಟೆಯಲ್ಲಿಮಲ್ಲಿಗೆ ಕೆಜಿಗೆ ರೂ.320 ಇದ್ದರೆ, ಮರ್ಲೆಗೆ ರೂ.120 ಇದೆ, ಕಳೆದ ವಾರ ಕ್ರಮವಾಗಿ ರೂ.280, ರೂ.80 ಇತ್ತು. 160 ರೂ ಇದ್ದ ಸೇವಂತಿಗೆ ಈ ವಾರ ರೂ.200 ಆಗಿದೆ. ಬಟನ್‌ ಗುಲಾಬಿಯ ಬೆಲೆ ಇಳಿಕೆಯಾಗಿದೆ. ಹೋದ ವಾರ ರೂ. 160 ಇದ್ದರೆ ಸೋಮವಾರ ರೂ.120 ಇತ್ತು. ಮದುವೆ ಸಮಾರಂಭಗಳ ಸೀಸನ್‌ ಆಗಿರುವುದರಿಂದ ಸೇವಂತಿಗೆ, ಮಲ್ಲಿಗೆ, ಮರ್ಲೆ ಹೂವಿಗೆ ಬೇಡಿಕೆ ಹೆಚ್ಚಾಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಬೀನ್ಸ್‌, ಟೊಮೇಟೊ ಅಗ್ಗ
ತರಕಾರಿಗಳ ಪೈಕಿ ಬೀನ್ಸ್‌, ಟೊಮೇಟೊ ಬೆಲೆ ಕೊಂಚ ಇಳಿಕೆಯಾಗಿದೆ. ಎಂ.ಜಿ ಮಾರುಕಟ್ಟೆಯಲ್ಲಿ ಕೆಜಿ ಟೊಮೇಟೊ ರೂ.15 ಹಾಗೂ ಬೀನ್ಸ್‌ ರೂ.50ಕ್ಕೆ ಸಿಗುತ್ತದೆ. ಕಳೆದ ವಾರ ಕ್ರಮವಾಗಿ ರೂ.20 ಮತ್ತು ರೂ.60 ಇತ್ತು.

ಹಲವು ತಿಂಗಳುಗಳಿಂದ ಸ್ಥಿರವಾಗಿದ್ದ ಹಸಿಮೆಣಸಿನಕಾಯಿ ಮತ್ತು ದಪ್ಪ ಮೆಣಸಿನಕಾಯಿ ಬೆಲೆ ಈ ವಾರ ಕೆಜಿಗೆ ರೂ. 20 ರಷ್ಟು ಕಡಿಮೆಯಾಗಿದೆ, ಹಸಿಮೆಣಸಿಕಾಯಿ ಕೆಜಿಗೆ ರೂ.40 ಮತ್ತು ದಪ್ಪಮೆಣಸಿನಕಾಯಿ ರೂ.60ಕ್ಕೆ ಸಿಗುತ್ತಿದೆ. ಉಳಿದಂತೆ ಶುಂಠಿಯ ದುಬಾರಿ ಬೆಲೆ(ಒಂದು ಕೆಜಿಗೆ 200 ರೂ) ಈ ವಾರವೂ ಮುಂದುವರಿದಿದೆ. ಆಲೂಗಡ್ಡೆ ರೂ.30, ಈರುಳ್ಳಿ 20, ಮೂಲಂಗಿ ರೂ.30, ಬೆಳ್ಳುಳ್ಳಿ ರೂ.80 ಸೇರಿಂದತೆ ಇತರೆ ತರಕಾರಿಗಳ ಬೆಲೆಗಳಲ್ಲಿ ವ್ಯತ್ಯಾಸವಾಗಿಲ್ಲ..

ಮಾವಿನ ಹಣ್ಣುಗಳಿಗೆ ಬೇಡಿಕೆ
ಮಾವಿನ ಹಣ್ಣುಗಳು ಈ ವಾರವೂ ಬೇಡಿಕೆ ಉಳಿಸಿಕೊಂಡಿದ್ದು ಬೆಲೆಯಲ್ಲಿವ್ಯತ್ಯಾಸವಾಗಿಲ್ಲ. ರಸಪೂರಿ ಕೆಜಿಗೆ 100-120, ಸಿಂಧೂರಿ ಕೆಜಿಗೆ-80 ಬಾದಾಮಿ ಕೆಜಿಗೆ 140-160, ಮಲಗೋವಾ ಕೆಜಿಗೆ 160, ಮಲ್ಲಿಕಾ ಕೆಜಿಗೆ-80 ಸೇರಿದಂತೆ ನಾನಾ ತಳಿಗಳ ಮಾವಿನ ಹಣ್ಣುಗಳು ಗ್ರಾಹಕರನ್ನು ಅಕರ್ಷಿಸುತ್ತಿವೆ. ಹಾಪ್‌ಕಾಮ್ಸ್‌ನಲ್ಲಿ ನಾಲ್ಕು ತಳಿಗಳ ಹಣ್ಣುಗಳು (ರಸಪೂರಿ, ಸಿಂಧೂರ, ಬಾದಾಮಿ, ಮಲಗೋವಾ) ಸಿಗುತ್ತಿವೆ. ಬೆಲೆ ಕಳೆದ ವಾರದಷ್ಟೇ ಇದೆ. ಬಿಸಿಲ ಬೇಗೆ ಹೆಚ್ಚಿರುವುದರಿಂದ ಕಲ್ಲಂಗಡಿಗೆ ಬೇಡಿಕೆ ಇದ್ದು ಕೆಜಿಗೆ ರೂ.20 ಇದೆ. ಸೇಬು, ಮೂಸಂಬಿ, ಕಿತ್ತಳೆ, ದಾಳಿಂಬೆ ಸೇರಿದಂತೆ ಇತರೆ ಹಣ್ಣುಗಳ ಬೆಲೆಯಲ್ಲಿ ವ್ಯತ್ಯಾಸವಾಗಿಲ್ಲ.

ಕೋಳಿ ದರ ಹೆಚ್ಚಳ
ಕೋಳಿ ಮಾಂಸದ ಬೆಲೆ ಏರಿಕೆಯಾತ್ತಲೇ ಸಾಗಿದ್ದು, ಈ ವಾರವೂ ಹೆಚ್ಚಳವಾಗಿದೆ. ಬ್ರಾಯ್ಲರ್‌ ಕೋಳಿ ಕೆಜಿಗೆ 140, ರಾ ಚಿಕನ್‌ ಕೆಜಿಗೆ 220, ಸ್ಕಿನ್‌ಲೆಸ್‌ ಕೆಜಿಗೆ 230 ಮೊಟ್ಟೆ ಕೋಳಿ(ಫಾರಂ) ಕೆಜಿಗೆ 90 ಕ್ಕೆ ಏರಿಕೆಯಾಗಿದೆ.

ಮೀನು ಮಾರಾಟ
ಬಂಗುಡೆ, ಬೂತಾಯಿ, ಕಪ್ಪುಮಾಂಜಿ, ಏಡಿ ಬೆಲೆ ಇಳಿಕೆಯಾಗಿದ್ದರೆ, ಅಂಜಲ್‌, ಬೊಳಿಂಜರ್‌, ಸೀಗಡಿ ದರ ದುಬಾರಿಯಾಗಿದೆ. ಬಂಗುಡೆ ಕೆಜಿಗೆ ರೂ 160, ಬೂತಾಯಿ, ಕೆಜಿಗೆ 140, ಅಂಜಲ್‌ ಕೆಜಿಗೆ 1.150, ಬೊಳಿಂಜರ್‌ ರೂ.270, ಬಿಳಿಮಾಂಜಿ ಕೆಜಿಗೆ 1500, ಕಪ್ಪುಮಾಂಜಿ ಕೆ.ಜಿ ರೂ.870, ಸೀಗಡಿ ಕೆಜಿಗೆ 650 ಏಡಿ ಕೆ.ಜಿ ರೂ.370 ನಗರದಲ್ಲಿಮಾರಾಟವಾಗುತ್ತಿದೆ.